இந்திய முஸ்லிம்கள் சவால்கள், சாத்தியங்கள் & செயல்திட்டம்

இந்த நூல் இனிய நூல். மாறுபட்ட நூல். பிரச்னைகளைப் பேசுகின்ற, அலசுகின்ற அதே வேளையில் தீர்வையும் செயல்திட்டத்தையும் தருகின்ற நூல்.

முஸ்லிம்களின் இருப்புக்கே உலை வைக்கின்ற அளவுக்குப் பேருருவம் எடுத்துவிட்டுள்ள சவால்களைக்கூட வளர்ச்சிக்கும் வளத்துக்கும் வித்திடுகின்ற வாய்ப்புகளாய் மாற்றிக் கொள்கின்ற உத்திகளை விவரிக்கின்ற நூல். இன்று உலகமெங்கும் இஸ்லாத்துக்கும் முஸ்லிம்களுக்கும் எதிராக இருபத்திநான்கு மணிநேரமும் அவதூறு பரப்புரை முடுக்கிவிடப்பட்டிருக்கின்ற நிலையில் முஸ்லிம்களுக்கு அவர்கள் மீதுள்ள பொறுப்புகளை உணர்த்துகின்ற நூல்தான் இந்நூல்.

உலக நிலைமைகள் பற்றிய துல்லியமான ஆய்வுடன் நூல் தொடங்குகின்றது. உலக நடப்புகளையும் அவற்றின் பின்புலத்தில் இயங்குகின்ற ஆதிக்க சக்திகளின் விழைவுகளையும் சேட்டைகளையும் தமக்கேயுரிய பாணியில் விறுவிறுப்பாக விவரிக்கின்றார் நூலாசிரியர்.

உலக அரசியலில் இஸ்லாத்துக்கு இருக்கின்ற முக்கியத்துவத்தை பதிவு செய்துள்ள விதம் அருமை. வேகமாக சரிந்து வருகின்ற மேற்கத்திய பண்பாட்டின் வீழ்ச்சிக்கான காரணங்களை அலசியிருப்பதும், அத்துடன் இஸ்லாமோஃபோபியா என்கிற வெறுப்பு அரசியலின் ஆறு பரிமாணங்களைப் பட்டியலிட்டிருப்பதும் வாசகரை யோசிக்க வைக்கும்.

அடுத்து இந்திய நிலைமைகள் மீதான அறிவார்ந்த அலசலை வழங்குகின்றார் நூலாசிரியர். பல்வேறு மதங்கள், மொழிகள், இனங்கள், பண்பாடுகள், சாதிகள், சமூகக் குழுக்கள் சேர்ந்து வாழ்கின்ற நம்முடைய நாட்டின் அரசியல், சமூக நிலைமைகளின் நாடித் துடிப்பைத் துல்லியமாய் உணர்த்துவதாய் இந்த அலசல் மிளிர்கின்றது.

குறிப்பாக நிறுவனமயமாக்கப்பட்ட மதவாதம் (Institutional Communalism), மனோபாவங்களின் அடிப்படையில் சமூகங்களை அணிதிரட்டுகின்ற முயற்சி (Attitude Polarisation) ஆகியவற்றைப் பற்றிய குறிப்புகள் இன்று நாடு சந்தித்து நிற்கின்ற நெருக்கடியின் தீவிரத்தையும் உஷ்ணத்தையும் படம் பிடித்துக் காட்டுவதாய் இருக்கின்றன.

சோதனைகளுக்கும் பின்னடைவுகளுக்கும் கடுமையான நெருக்கடிகளுக்கும் ஆளாகின்ற போது சமூகங்களின் எதிர்வினை எத்தகையதாய் இருந்து வந்துள்ளன என்பதையும் எது சரியான, சிறப்பான எதிர் வினை என்பதையும் சுவையாக விவரிக்கின்றார் நூலாசிரியர்.

சோதனைகளின் போது நிராசையடைந்து முடங்கி விடுவதும், கொண்ட கொள்கைகளைக் காற்றில் பறக்க விட்டு சமரசம் செய்து கொள்வதும் தற்கொலைக்குச் சமமானது என வரலாற்றுச் சான்றுகளுடன் அழுத்தமாகப் பதிவு செய்கின்றார் நூலாசிரியர்.

இதே போன்று நெருக்கடிகளின் போது ஆத்திரப்பட்டு, ஆவேசப்பட்டு வன்செயல்களில் ஈடுபடுவதும் ஒட்டுமொத்த உலகத்தையே பகைவர்களாய் நினைத்து குமுறி வெடிப்பதும் கடும்போக்குவாதத்தை மேற்கொள்வதும் அழிவுக்கே இட்டுச் செல்லும் என்பதையும் வரலாற்றுச் சான்றுகளுடன் உணர்த்துகின்றார் நூலாசிரியர்.

தோல்விக்கும் இழிவுக்கும் இட்டுச் செல்கின்ற இந்த இரண்டு தீவிர நிலைப்பாட்டையும் நடத்தையையும் கைவிட்டு நெருக்கடிகளிலிருந்து முன்பை விட பன்மடங்கு அதிகமான வீர்யத்துடனும் வலிவுடனும் பற்றுடனும் மீண்டு எழுகின்ற பண்பை (Resilience) மேற்கொள்வதுதான் வெற்றிக்கு வித்திடும்; அது சமூகங்களில் புதைந்துள்ள ஆக்கப்பூர்வ ஆற்றல்களை உயிர்த்தெழச் செய்யும் என வலுவான வாதங்களுடன் ஆணித்தரமாக நிறுவுகின்றார் நூலாசிரியர். பதினெட்டு பக்கங்களில் விறுவிறுப்பாக நீள்கின்ற இந்த அலசல்தான் இந்த நூலின் ஹைலைட் எனலாம்.

மோசமான நிலைமைகளை எதிர்கொள்வதற்கும் பன்மைச் சமூகத்தில் சிறுபான்மையினர் தாக்கத்தை ஏற்படுத்துவதற்கும் அதன் மூலம் சமூக வலிமையைப் பெருக்கிக் கொள்வதற்கும் தேவையான காரணிகளாய் நூலாசிரியர் முன் வைக்கின்ற நான்கும் எந்தவொரு பன்மைச் சமூகச் சூழலிலும் அழுத்தமான, ஆழமான தாக்கங்களை ஏற்படுத்தும் என்பதில் அய்யமில்லை. குறிப்பாக நன்மையளிக்கும் ஆற்றல் (Exchange Power) குறித்து நூலாசிரியர் விவரித்துள்ள குறிப்புகளும் செய்திகளும் வாசகரின் மனத்துக்குள் புது வெளிச்சத்தைப் பாய்ச்சும் என்பது உறுதி. சமூக வலிமையைப் பற்றிய இந்த விவாதத்தின் இறுதியில் இதற்காக வேண்டி முஸ்லிம்கள் உடனடியாகக் கவனத்தில் கொள்ள வேண்டிய ஆறு இலக்குகளை நினைவூட்டியிருப்பது சிறப்பு.

மதவாதத்தை முறியடிப்பதற்காக நூலாசிரியர் முன் வைக்கின்ற யோசனைகள் உடனடியாக நடைமுறைப்படுத்தப்பட வேண்டிய சத்தான யோசனைகள். மதச் சண்டைகளுக்கு பெயர் பெற்ற அலீகர், மத நல்லிணக்கத்துக்கு அடையாளமாய் இருக்கின்ற கோழிக்கோடு ஆகிய இரண்டு நகரங்களின் சமூகச் சூழல்களை ஒப்பாய்வு செய்த சமூகவியல் வல்லுநரின் ஆய்வு முடிவுகளும் அவற்றை அடிப்படையாகக் கொண்டு நூலாசிரியர் முன் வைக்கின்ற வழிமுறைகளும் கவனத்தை ஈர்க்கின்றன.

முஸ்லிம்களையும் முஸ்லிம் தலைவர்களையும் விளித்து பத்து அம்சத் திட்டம் ஒன்றை நூலின் இறுதியில் தனி அத்தியாயமாகவே வழங்கியிருக்கின்றார் நூலாசிரியர். முத்து முத்தாகத் தரப்பட்டுள்ள இந்தப் பத்தும் செம்மையாகக் கடைப்பிடிப்படுமேயானால் முஸ்லிம்களையும் நாட்டையும் பீடித்துள்ள நெருக்கடிகள் அனைத்தும் பஞ்சாய்ப் பறந்து போகும் என அறுதியிட்டுச் சொல்லலாம்.

நூலாசிரியரான சையத் சஆதத்துல்லாஹ் ஹுசைனி நாடறிந்த அறிஞர். பன்னூல் ஆசிரியர். மாணவப் பருவத்திலிருந்தே இந்தியாவையும் இந்திய முஸ்லிம் சமூகத்தையும் நல்ல முறையில் அறிந்து தெளிந்தவர். பொறியியலில் படித்துத் தேர்ந்தாலும் மார்க்கத்திலும் தேர்ச்சியும் புலமையும் பெற்றவர். தொலைநோக்கும் விஷயஞானமும் மிக்கவர். உலகமயமாக்கலின் கோர விளைவுகளைத் துல்லியமாகக் கணித்து எச்சரித்த சிந்தனையாளர். இந்திய மாணவர் இஸ்லாமிய அமைப்பின் அகில இந்தியத் தலைவராகப் பணியாற்றியவர். தற்சமயம் ஜமாஅத்தே இஸ்லாமி ஹிந்த் அகில இந்தியத் தலைவராக இருக்கின்றார். ‘உலகமயமாக்கலும் முஸ்லிம் இளைஞர்களும்’, ‘பன்மைச் சமூகத்தில் முஸ்லிம்களின் பொறுப்புகள்’ ஆகிய நூல்களை எழுதியிருக்கின்றார்!

இன்றையக் கொந்தளிப்பான நாள்களில் ஒவ்வொரு முஸ்லிமும் சாமான்யர்கள் முதல் தலைவர்கள் வரை, பாமரர்கள் முதல் அறிஞர்கள் வரை, மாணவர்கள் முதல் குடும்பத் தலைவிகள் வரை அனைவரும் வாசிக்க வேண்டிய நூல் இது.

எல்லாப் புகழும் அல்லாஹ்வுக்கே!

– ஹெச். அப்துர் ரகீப்

நூல் : இந்திய முஸ்லிம்கள்
சவால்கள், சாத்தியங்கள் & செயல்திட்டம்

ஆசிரியர் : சையத் சஆதத்துல்லாஹ் ஹுசைனி

பக்கங்கள் 132 விலை ரூ90/-

வெளியீடு
இஸ்லாமிய நிறுவனம் ட்ரஸ்ட்

138 ஐஎஃப்டி லேன், பெரம்பூர் நெடுஞ்சாலை
சென்னை 600 012

தொலைபேசி : 266204401

தமிழ் சினிமாவில் முஸ்லிம்களின் வாழ்வியல் பதிவுகள் – இயக்குநர்களுடன் கலந்துரையாடல்

தமிழ் சினிமாவில் முஸ்லிம்களின் வாழ்வியல் பதிவுகள் – இயக்குநர்களுடன் கலந்துரையாடல்


ஜமாஅத்தே இஸ்லாமி ஹிந்த் தமிழக ஊடகத்துறை சார்பாக 2019 மே 4 ஆம் நாள் சென்னை கவிக்கோ மன்றத்தில்  ‘தமிழ் சினிமாவில் முஸ்லிம்களின் வாழ்வியல் பதிவுகள்’ நிகழ்வு மிகச் சிறப்பாக நடந்து முடிந்தது. எல்லாப் புகழும் இறைவனுக்கே..!

டாக்டர் ஸலாஹுதீன் வரவேற்றுப் பேசினார். மாநிலத் தலைவர் ஷப்பீர் அஹமத் தொடக்கவுரை நிகழ்த்தினார்கள். இயக்குநர்கள் பாலாஜி சக்திவேல், மீரா கதிரவன், லெனின் பாரதி, தாமிரா, கோபி நைனார், ராஜு முருகன், மாரி செல்வராஜ், அனீஸ் ஆகியோர் மனம்திறந்த விரிவான கருத்துரைகளை வழங்கினர். கவிஞர் மனுஷ்ய புத்திரன் தொகுப்புரை நிகழ்த்தினார். கவிஞர் யுகபாரதி நிறைவுரை வழங்கினார். இந்த நிகழ்வை மாநில ஊடகச் செயலாளர் வி.எஸ். முஹம்மத் அமீன் தொகுத்து வழங்கினார். 

இருபதுக்கும் மேற்பட்ட தொலைக்காட்சி, வலைதள தொலைக்காட்சிகள் இந்த நிகழ்வைப் பதிவு செய்து பலதளங்களில் செய்திகளைக் கொண்டு சேர்த்தன.

ஒரே நாளில் இலட்சக்கணக்கான மக்கள் இந்த நிகழ்வைப் பார்த்ததுடன், பல்வேறு கருத்துகளைப் பதிவிட்டுள்ளனர். தமிழ் சினிமாவில் முஸ்லிம்கள் வாழ்வியல் குறித்த வாத விவாதங்களை திரையுலகிலும், முஸ்லிம் சமூகத்திலும் இந்த நிகழ்வு ஏற்படுத்தியுள்ளது. அல்ஹம்துலில்லாஹ்.

ஜமாஅத்தே இஸ்லாமி ஹிந்த் மாநிலத் தலைவர் நியமனம்

 

ஜமாஅத்தே இஸ்லாமி ஹிந்த் மாநிலத் தலைவர் நியமனம்

 

2019 ஏப்ரல் முதல் 2023 மார்ச் வரைக்குமான இந்த புதிய மீகாத்தின் ஜமாஅத்தே இஸ்லாமி ஹிந்த் தமிழகம், புதுச்சேரி மாநிலத் தலைவராக மெளலவி முஹம்மத் ஹனீஃபா மன்பஈ அவர்களை அகில இந்தியத் தலைவர் சையத் சஆத்துல்லாஹ் ஹுஸைனி அவர்கள் நியமித்துள்ளார்கள்.

புதிய அமீரே ஹல்காவின் பணிகள் சிறப்பாக அமைய எல்லாம் வல்ல அல்லாஹ் அருள் புரிவானாக..!

திமுக தலைமையிலான கூட்டணிக்கு ஜமாஅத்தே இஸ்லாமி ஹிந்த் ஆதரவு

 

2019 மக்களவைத் தேர்தல் நிலைப்பாடு குறித்த ஜமாஅத்தே இஸ்லாமி ஹிந்தின் சிறப்பு ஆலோசனைக் கூட்டம் மார்ச் 16 ஆம் நாள் நடைபெற்றது. வருகின்ற மக்களைவைத் தேர்தலில் வகுப்புவாதிகள் மீண்டும் ஆட்சிக்கு வந்துவிடக்கூடாது என்பதைக் கருத்தில் கொண்டு அதற்கான வலிமையான கூட்டணிக்கு வாக்களிக்க ஜமாஅத் முடிவு செய்துள்ளது. அந்த அடிப்படையில் தமிழகத்தில் திராவிட முன்னேற்றக் கழகத்தின் தலைமையில் அமைந்துள்ள மதச்சார்பற்ற கூட்டணிக்கு வாக்களிப்பது என தீர்மானிக்கப்பட்டது.

எதிர்வருகின்ற நாடாளுமன்றத் தேர்தல் கட்சிகளுக்கிடையேயான தேர்தல் அல்ல. ஜனநாயகத்திற்கும் வகுப்புவாதத்திற்குமான தேர்தல். வகுப்புவாத சக்திகளை வீழ்த்துவதன் மூலமே நம் தேசத்தை மீட்டெடுக்க முடியும். இத்தகைய முக்கியத்துவம் வாய்ந்த தேர்தல் என்பதை உணர்ந்துதான் ஜனநாயக சக்திகள் பல்வேறு சமரசங்களுடனும், விட்டுக் கொடுப்புகளுடனும் கைகோர்த்து இந்தத் தேர்தலை எதிர்கொள்கின்றன.

அந்த வகையில் தமிழகத்தில் அதிமுக தலைமையிலான வகுப்புவாதக் கூட்டணி வீழ்த்தப்பட வேண்டும் என்றால் நமது வாக்குகள் ஒருமுகப்படுத்தப் பட வேண்டும். சமுதாய நலனை மட்டுமே முன்னிறுத்தாமல் தமிழகத்தின், இந்தியாவின் எதிர்கால நலனைக் கருத்தில் கொண்டே ஜமாஅத் திமுக கூட்டணிக்கு வாக்களிக்க முடிவு செய்துள்ளது. வகுப்புவாதம் என்பது சிறுபான்மை, தலித்களுக்கு மட்டுமே எதிரானது அல்ல. ஒட்டுமொத்த மனித குலத்திற்கே எதிரானதுதான் வகுப்புவாத பாஸிசம். எனவே ஜனநாயகம் வலுப்பெற வேண்டுமென்றால் பாசிஸம் வீழ்த்தப்பட வேண்டும். அதற்கான நல்வாய்ப்பாகவே இந்தத் தேர்தலை ஜமாஅத் நோக்குகிறது.

ஹரியானா தாக்குதல் ஜமாஅத்தே இஸ்லாமி ஹிந்த் தலைவர்கள் நேரில் சந்தித்து ஆறுதல்

மார்ச் 23 ஆம் நாள் ஹரியானா மாநிலத்தின் குர்காவுன் நகரில் உள்ள தமாஸ்பூர் கிராமத்திலுள்ள முஸ்லிம் குடும்பத்தினர் மீது 20க்கும் மேற்பட்ட ஆயுதம் தாங்கிய சங்பரிவார் வகுப்புவெறிக் கும்பல் தாக்குதல் நடத்தின.
வீட்டின் உரிமையாளர் முஹம்மத் சாஜித், அவரது குடும்பத்தினர், வெளியூரிலிருந்து வந்த உறவினர்கள் கடும் தாக்குதலுக்கு உள்ளானர்.

ஹோலி பண்டிகையின் மாலை அன்று சாஜித்தின் வீட்டிற்கு வெளியே அவரது குடும்பத்தினர் கிரிக்கெட் விளையாடிக் கொண்டிருந்த பொழுது இருசக்கர வாகனத்தில் வந்த இருவர் “பாகிஸ்தானுக்கு சென்று விளையாடுங்கள்” என்று கூறி பிரச்னையில் ஈடுபட்டுள்ளனர். அதனைத் தொடர்ந்து இந்த கொலை வெறித் தாக்குதல் நடைபெற்றது.

இந்த சம்பவத்திற்கு ஜமாஅத்தே இஸ்லாமி ஹிந்த் கடும் கண்டனத்தைத் தெரிவித்ததுடன் ஹரியானா ஜமாஅத்தே இஸ்லாமி தோழர்கள் தாக்குதலுக்கு உள்ளான குடும்பத்தினரைச் சந்தித்து ஆறுதல் கூறினர். ஜமாஅத்தே இஸ்லாமி ஹிந்த் தலைமையகத்திலிருந்து குழு ஒன்று ஹரியானா சென்று அக்குடும்பத்தினரைச் சந்தித்து ஆறுதல் அளித்ததுடன், சட்ட ரீதியான நடவடிக்கை எடுக்க அரசு அதிகாரிகளைச் சந்தித்து புகார் அளித்தது.

பாதிக்கப் பட்ட நபர்களுக்கு உதவுவதுடன், அவர்களுடக்கு ஆதரவாக ஜமாஅத் உறுதுணையாக நிற்கும் என்பதையும் அந்தச் சந்திப்பின் வாயிலாக எடுத்துரைத்தனர்.

போர் பீதியை ஏற்படுத்துவதை ஊடகங்கள் தவிர்க்க வேண்டும். ஜமாஅத்தே இஸ்லாமி ஜம்மு காஷ்மீர் மீதான தடையைத் திரும்பப் பெற வேண்டும். முஸ்லிம்கள் மீது போடப்பட்ட பொய் வழக்குகளைத் திரும்பப் பெற வேண்டும் – ஜமாஅத்தே இஸ்லாமி ஹிந்த் மத்திய தலைமை அறிக்கை

 

புதுதில்லி, மார்ச் 02

அண்டை நாடுகளான இந்தியா- பாகிஸ்தானுக்கிடையே புல்வாமா தாக்குதலுக்குப் பிறகு நிலவிவந்த உச்சபட்ச போர்ச் சூழல் தற்போது தனிந்துள்ளதையும், இணக்கமான சூழலாக மாறியிருப்பதற்கும் ஜமாஅத்தே இஸ்லாமி ஹிந்த் வாழ்த்துகளை தெரிவிக்கிறது. ஜமாஅத்தின் அகில இந்தியத் தலைவர் மௌலானா சையத் ஜலாலுதீன் உமரி, அகில இந்திய துணைத்தலைவர் நுஸ்ரத் அலீ, அகில இந்திய பொதுச்செயலாளர் முஹம்மது சலீம் ஆகியோர் கலந்துகொண்ட ஊடகவியலாளர்கள் சந்திப்பில் கூறியிருப்பதாவது:

“இரு நாடுகளுக்கிடையே நிலவிவந்த இறுக்கமான சூழ்நிலை தற்போது தனிந்துள்ளது பாராட்டத்தக்கது. இந்தச் சூழலுக்கு தீர்வுகாணவும், இரு நாடுகளுக்கிடையே அமைதி, சமாதானம் நிலைபெறவும் நடைமுறை சார்ந்த நடவடிக்கைகள் மேற்கொள்ளப்பட வேண்டும். இரு நாடுகளுக்கிடையே நிலவிவந்த இறுக்கமான சூழல் தற்போது தனிந்துள்ளதையும், அமைதிப் பேச்சுவார்த்தைகளின் மூலம் தீர்வுகாண இரு நாடுகளும் முயல்வதையும் யாவரும் அறிவர்.

கடந்த பிப்ரவரி 14 ஆம் தேதி நடைபெற்ற புல்வாமா தாக்குதலுக்கு ஜமாஅத் கடுமையான கண்டனங்களைத் தெரிவிக்கும் அதே வேளையில் நாட்டை ஆளும் கட்சி இதனைத் தனது அரசியல் ஆதாயங்களுக்காகவும் தேர்தல் பரப்புரைகளுக்காகவும் பயன்படுத்த முயல்வது மிகவும் அதிர்ச்சியளிகின்ற செயலாகும். இதற்கு அனைத்து எதிர்க்கட்சிகளும் கடும் ஆட்சேபம் தெரிவித்துள்ளது குறிப்பிடத்தக்கது. புல்வாமா தாக்குதலின்போது நிகழ்ந்த பாதுகாப்புக் குளறுபடிகளையும் பலவீனங்களையும் உரிய முறையில் விசாரணை மேற்கொண்டு இதற்குக் காரணமான அனைவரையும் தண்டிக்க உயர்மட்ட அளவிலான விசாரணை மேற்கொள்ளப்படவேண்டும்.

ஜமாஅத்தே இஸ்லாமி ஹிந்தின் அகில இந்திய பொதுச்செயலாளர் முஹம்மது சலீம் இதுகுறித்து கூறுகையில் “இரு நாடுகளுக்கிடையேயான சூழல் ஏற்கனவே சுமூகமாக இல்லாதபோது இந்தத் தாக்குதலை ஊடகங்கள் அதிலும் குறிப்பாக சமூக ஊடகங்கள் மிகவும் பொறுப்பற்ற முறையில் கையாண்டது. தொலைக்காட்சி பதிவுக்கூடங்கள் போர்க்கூடங்களாக மாறிவிட்டதைப் போன்று காட்சியளித்தது. நம் அன்டை நாட்டுடன் போரை விரும்புகின்ற வகையில் ஊடகங்களின் செயல்பாடுகள் அமைந்தது வருத்தத்திற்குரியது. தொலைக்காட்சி நிலையங்களில் இருந்து ஒளிபரப்பப்படும் விவாதங்களும் கருத்துப்பரிமாற்றங்களும் போரைத் தூண்டக்கூடிய பரப்புரையாகவே இருந்தன. நம் தேசத்தின் பாதுகாப்பினைக் கருத்தில் கொண்டு மிகவும் முதிர்ந்த பொறுப்புள்ள வகையில் தனது பங்கினை ஊடகங்கள் ஆற்றிடவேண்டும் என்பதே ஜமாஅத்தே இஸ்லாமி ஹிந்தின் எதிர்பார்ப்பாகும்.”

“மத்திய அரசு ஜமாஅத்தே இஸ்லாமி ஜம்மு-காஷ்மீர் இயக்கத்தைத் தடை செய்து அதன் தலைவர்கள், உறுப்பினர்களைக் கைது செய்துள்ளதை மிகவும் தவறான விவேகமற்ற செயலாகக் கருதுகிறோம். அந்த இயக்கம் அம்மாநில மக்களின் கல்வி, சமூக சீரமைப்பு, மக்கள் நலன், தொண்டு புரிவதில் மிகவும் உயிர்ப்புடன் செயல்பட்டு வருகிறது. அந்த இயக்கத்தின் சமூகப் பங்களிப்பினைக் கருத்தில்கொண்டு அந்த இயக்கத்தின் மீதான தடையை அரசு திரும்பப்பெற வேண்டும். அதன் மூலம் ஜம்மு-காஷ்மீர் மக்களுக்குத் தெளிவான நேர்மறையான செய்தியினை கொண்டு சேர்க்கும்.” என கேள்வியொன்றிற்குப் பதிலளிக்கையில் தெரிவித்தார் ஜமாஅத்தே இஸ்லாமி ஹிந்தின் அகில இந்தியத் தலைவர் மௌலானா ஜலாலுதீன் உமரி அவர்கள்.

சற்றேறக்குறைய 25 ஆண்டுகளை சிறையில் கழித்த 11 முஸ்லிம் இளைஞர்களை குற்றமற்றவர்கள் என நாசிக் சிறப்பு தடா நீதிமன்றம் விடுவித்துள்ளது மகிழ்ச்சிக்குரியது. ‘நீண்ட சிறைவாசத்திற்குப் பின்னர் வழங்கப்பட்டுள்ள இந்தத் தீர்ப்பும் இதே போன்ற பல்வேறு வழக்குகளின் தீர்ப்புகளும், பொய்யான ஜோடிக்கப்பட்ட குற்றச்சாட்டுகளின் அடிப்படையில் முஸ்லிம் இளைஞர்கள் கைது செய்யப்பட்டு அவர்களின் வாழ்க்கை கேள்விக்குறியாக மாற்றப்படுகிறது’என்று ஜமாஅத்தே இஸ்லாமி ஹிந்த் பன்னெடுங்காலமான முன்வைத்துவரும் குற்றச்சாட்டினை நிரூபிக்கும் விதத்தில் அமைந்துள்ளது. இதுபோன்ற ஜோடிக்கப்பட்ட, உறுதிப்படுத்தும் வகையிலான ஆதாரங்களற்ற, சந்தேகத்தின் அடிப்படையிலான வழக்குகளில் கைது செய்யப்பட்டு நாடு முழுவதும் சிறையிலுள்ள முஸ்லிம் இளைஞர்களின் மீதான வழக்குகளை மத்திய மாநில அரசுகள் திரும்பப்பெற வேண்டும்.’என தெரிவித்தார் ஜமாஅத்தின் அகில இந்திய பொதுச்செயலாளர் முஹம்மத் சலீம்.

********

புல்வாமா பயங்கரவாதத் தாக்குதலுக்கு ஜமாஅத்தே இஸ்லாமி ஹிந்த்கடும் கண்டனம்

புல்வாமா பயங்கரவாதத் தாக்குதலுக்கு ஜமாஅத்தே இஸ்லாமி ஹிந்த்கடும் கண்டனம்
—————————————————————————————————————————–

ஜம்மு காஷ்மீர் மாநிலம் புல்வாமா மாவட்டத்தில் மத்திய ரிசர்வ் போலீஸ் படையினர் மீது திட்டமிட்டு அரங்கேற்றப்பட்டுள்ள பயங்கரவாதத் தாக்குதலுக்கு ஜமாஅத்தே இஸ்லாமி ஹிந்தின் அகில இந்தியத் தலைவர் *மௌலானா சையத் ஜலாலுத்தீன் உமரி* கடும் கண்டனம் தெரிவித்துள்ளார்.

இது கடும் கண்டனத்துக்குரியது. கோழைத்தனமானது. வன்முறைப் பாதையும் படுகொலைத் தாக்குதலும் மக்களின் உயிர்களை வேண்டுமானால் பறிக்கலாம்; பேரழிவை ஏற்படுத்தலாம்; ஆனால் அது எந்தப் பிரச்னைக்கும் தீர்வாக ஒருபோதும் அமையாது.

இந்தத் தாக்குதலில் மத்திய ரிசர்வ் காவல்படையினர் 44 பேர் தங்களின் இன்னுயிரை நீத்துள்ளனர் என்ற செய்தி மிகுந்த வேதனையைத் தருகிறது. சூழலை இன்னும் களங்கப்படுத்துவதற்குப் பதிலாக, அந்தப் பகுதியில் அமைதியையும் பாதுகாப்பையும் மீண்டும் நிலைநாட்டத் தேவையான நடவடிக்கைகள் உடனடியாக எடுக்கப்பட வேண்டும். இது பேச்சுவார்த்தை, உரையாடல்கள் வழியாகத்தான் சாத்தியமாகும். இது காஷ்மீர் மக்களின் உள்ளக்குமுறல்களுக்கான தீர்வை நோக்கி இட்டுச் செல்லும். அமைதி, நிலைத்தன்மை கொண்ட சூழலை உருவாக்க இது துணை புரியும்.

“இந்தத் தாக்குதலுக்குக் காரணமான அம்சங்கள் குறித்து விரிவான விசாரணை நடத்தப்படும்” என்ற மத்திய அரசின் அறிவிப்பை நாங்கள் வரவேற்கின்றோம். இதன் மூலம் இந்தத் தாக்குதலுக்குப் பின்னால் மறைந்துள்ள உண்மைகள் வெளிவரக் கூடும். இந்தத் தாக்குதலின் உண்மையான நோக்கம் என்ன என்பதை நாம் கண்டறிந்தாக வேண்டும். காஷ்மீரில் தற்போதுள்ள சூழ்நிலையைச் சீர்குலைக்கும் நோக்கில் நடத்தப்பட்டதா? அல்லது இந்தியா – பாகிஸ்தான் நல்லுறவைக் குலைக்கவா? அல்லது நாடாளுமன்றப் பொதுத் தேர்தலுக்கு முன்பாக நமது நாட்டில் நிலவி வரும் அமைதியையும் பரஸ்பரம் இணைந்து வாழும் தன்மையையும் சீர்குலைக்கும் மிகப்பெரும் சதித் திட்டத்துடன் இது நடத்தப்பட்டுள்ளதா? என்பதையெல்லாம் கண்டறிந்தாக வேண்டும்.

இந்தத் தாக்குதலில் உயிரிழந்த வீரர்களுக்கு எமது ஆழ்ந்த அனுதாபங்களைத் தெரிவித்துக் கொள்கிறோம். படுகாயமுற்று மருத்துவமனையில் சிகிச்சைக்காக அனுமதிக்கப் பட்டிருப்பவர்கள் விரைவாக உடல்நலம் பெற எல்லாம் வல்ல ஏகஇறைவனிடம் மனமுருகிப் பிரார்த்தனை செய்கிறோம்.

ஊடகத் துறை
ஜமாஅத்தே இஸ்லாமி ஹிந்த்

தி இந்து நாளிதழுக்கு மறுப்பு

செய்தியும்,மறுப்பும்
———————————-
‘மசூதிக்குள் பெண்கள் செல்ல இஸ்லாம் மார்க்கத்தில் அனுமதி கிடையாது.’ என்ற செய்தியை தி இந்து நாளிதழில் பார்த்ததும் ஆசிரியரைத் தொடர்பு கொண்டு பேசினோம். நமது மறுப்பை கடிதம் வாயிலாகத் தெரியப்படுத்தியிருந்தோம். இன்றைய 11/01/2019 இந்து நாளிதழில், ஜமாஅத்தே இஸ்லாமி ஹிந்த் மாநில மகளிர் அணித் தலைவர் பாகிரா அளித்த மறுப்புச் செய்தி வெளியானது.

– ஜமாஅத்தே இஸ்லாமி ஹிந்த்
ஊடகத்துறை

நடிகர் செந்தில் அவர்களுடன் சந்திப்பு

நடிகர் செந்தில் அவர்களுடன் சந்திப்பு

 

 

ஜமாஅத்தே இஸ்லாமி ஹிந்த் சார்பாக நகைச்சுவை நடிகர் செந்தில் அவர்களை அவரது இல்லத்தில் சந்தித்து நூல்கள் வழங்கப்பட்டன. இந்த சந்திப்பு நிகழ்வில் ஜமாஅத்தே இஸ்லாமி ஹிந்த் மாநில மக்கள் தொடர்பு, ஊடகச் செயலாளர் வி.எஸ்.முஹம்மத் அமீன், சென்னை மாநகரத் தலைவர் கே.ஜலாலுதீன், எஸ்.என். சிக்கந்தர், புர்ஹான்ஷா ஆகியோர் கலந்து கொண்டனர்.

சாகித்ய அகாதமி விருது பெற்ற எழுத்தாளர் எஸ்.ராவுக்கு ஜமாஅத்தே இஸ்லாமி ஹிந்த் நேரில் வாழ்த்து

சாகித்ய அகாதமி விருது பெற்ற எழுத்தாளர் எஸ்.ராமகிருஷ்ணன் அவர்களை அவரது அலுவலகத்திற்குச் சென்று ஜமாஅத்தே இஸ்லாமி ஹிந்த் சார்பாக வாழ்த்துகளைத் தெரிவித்து நூல்களை வழங்கினோம்.

ஜமாஅத்தே இஸ்லாமி ஹிந்த் சென்னை மாநகரத் தலைவர் கே.ஜலாலுதீன், மாநில மக்கள் தொடர்புச் செயலாளர் வி.எஸ்.முஹம்மத் அமீன், வெல்ஃபேர் பார்ட்டியின் தேசியப் பொருளாளர் எஸ்.என். சிக்கந்தர், ஜமாஅத் HRD துறை புர்ஹான் ஷா ஆகியோர் இந்த சந்திப்பில் கலந்து கொண்டனர்.

– மக்கள் தொடர்புத் துறை
ஜமாஅத்தே இஸ்லாமி ஹிந்த்